Azərbaycan Kapoeyra Federasiyası DOST İnklüziv İnkişaf və Yaradıcılıq Mərkəzi ilə birgə “Kapoeyra ilə ümid yarat!” layihəsinə start verib. Azərbaycan Kapoeyra Federasiyasının yığma komandasının və məşqçilər kollegiyasının üzvləri, eyni zamanda DİİYM-nin Kapoeyra üzrə təlimçiləri Asya Atayeva və Elsəvər Heydərov bu şüarla Sosial Xidmətlər Agentliyinin sosial xidmət müəssisələrində təlimlərə başlayıblar.
Layihənin məqsədi uşaq evlərində, sığınacaqlarda yaşayan valideyn himayəsindən məhrum və ya valideynini itirmiş uşaqlarda kapoeyraya maraq oyatmaqdır. Layihəyə 6 yaşdan yuxarı yeniyetmə yaşınadək şəxslərin qatılması nəzərdə tutulub.
İlkin mərhələdə təlimlərə cəlb olunmuş uşaqlar kapoeyra idman növü haqqında məlumatlandırılacaq. Növbəti mərhələdə isə onların potensialı qiymətləndirilərək DOST İnklüziv İnkişaf və Yaradıcılıq Mərkəzində kapoeyra təlimlərinə yönəldiləcək.
Layihə çərçivəsində uşaqlara psixososial dəstək, eyni zamanda onların emosional dayanıqlığının və dözümlülüyünün inkişafına köməklik göstəriləcək. Bundan əlavə, xüsusi testlər vasitəsilə ehtiyaclar müəyyən olunaraq müvafiq dəstək seansları təşkil ediləcək. Kapoeyra təlimləri uşaqların fiziki sağlamlığını və özünəinamını artırmaqla yanaşı, onların sosial bacarıqlarının inkişafına da töhfə verəcək.
Aztəminatlı ailələrin övladları, müharibə ilə əlaqədar əlilliyi olan şəxslərin uşaqları və şəhid ailələrinin üzvlərinin də bu layihəyə cəlb edilərək, Mərkəzdə Kapoeyra klubunun yaradılması da planlaşdırılır. Gələcəkdə klubun üzvlərinin ölkə və beynəlxalq çempionatlarda iştirakının təmin edilməsi də prioritet məsələdir.
Qeyd edək ki, Kapoeyra ən çox maraq göstərilən təlim sahələrindən biridir. Benefisiarların 12.3 faizi bu idman növü üzrə təlimlərdə iştirak edirlər.