Fevralın 20-də Milli Olimpiya Komitəsinin (MOK) Baş Məclisi keçirilib.Səsvermənin yekun nəticələrinə əsasən, Azərbaycan Respublikasının Prezidenti İlham Əliyev yenidən Milli Olimpiya Komitəsinin prezidenti seçilib. Eyni zamanda, Milli Olimpiya Komitəsinin İcraiyyə Komitəsinə yeni üzvlər seçilib. İcraiyyə Komitəsinin üzvləri sırasında tanınmış idman xadimləri və Olimpiya çempionları yer alır. Bunlar Azər Əliyev, Çingiz Hüseynzadə, Zemfira Meftahətdinova, Fərid Mansurov, Elnur Məmmədli, Faiq Qarayev, Alla Həsənova, Nazim Hüseynov və Namiq Abdullayevdir.
MOK-un Baş Məclisində ölkənin müxtəlif idman federasiyaları da iştirak edib. Azərbaycan Kapoeyra Federasiyası (AKF) da bu mötəbər tədbirdə təmsil olunub. Federasiyamızın səsvermə hüququ olub və Baş Məclisdə Azərbaycan Kapoeyra Federasiyasının prezidenti Günel Muradova iştirak edib.
Bu seçkilər Azərbaycan idmanının inkişafında yeni bir mərhələnin başlanğıcı kimi qiymətləndirilir. Azərbaycan Kapoeyra Federasiyası olaraq, ölkəmizdə idmanın və Olimpiya dəyərlərinin təşviqinə töhfə verməyə davam edəcəyik.
